काठमाडौँ — अमेरिकाले इरानमाथि फेरि एक चरणको हवाई आक्रमण गरेको जनाएको छ । तेहरानले स्ट्रेट अफ होर्मुज हुँदै गुज्रिरहेको एक व्यापारिक जहाजमाथि आक्रमण गरेपछि जवाफी कारबाहीस्वरूप हवाई हमला गरिएको अमेरिकी दाबी छ । इरानको इस्लामिक रिभोलुसनरी गार्ड कोर्प्स (आईआरजीसी) ले भने राज्य सञ्चारमाध्यममार्फत अर्को सूचना नआएसम्मका लागि स्ट्रेट अफ होर्मुज बन्द गरिएको जनाएको छ । आईआरजीसीका अनुसार उक्त जहाजले आफ्नो ट्र्याकिङ प्रणाली बन्द गरी स्वीकृत समुद्री मार्गबाट विचलित भएकाले त्यसलाई उल्लंघनकारी ठहर गर्दै आक्रमण गरिएको हो ।
अमेरिकी सेन्ट्रल कमान्डका अनुसार साइप्रसको झण्डा बोकेको एक व्यापारिक जहाजमाथि आईआरजीसीले आक्रमण गरेपछि यस साताभित्र तेस्रो चरणको हवाई कारबाही सञ्चालन गरिएको हो । अमेरिकी पक्षका अनुसार आक्रमणबाट जहाजको इन्जिन कक्षमा गम्भीर क्षति पुगेको छ, जसका कारण जहाजले यात्रा जारी राख्न सकेन। साथै, जहाजमा रहेका एक सर्वसाधारण चालकदल सदस्य बेपत्ता रहेको जनाएको छ । यसअघि पनि यही साता तीन वटा व्यावसायिक तेल ट्यांकरमाथि आक्रमण भएको थियो, जसले अमेरिका र इरानबीच तनाव थप चर्काएको छ । सेन्ट्रल कमान्डले सामाजिक सञ्जाल एक्समार्फत जारी विज्ञप्तिमा इरानलाई यसअघि व्यावसायिक जहाजमाथिका आक्रमणपछि अन्तर्राष्ट्रिय प्रतिबद्धताको पालना गर्ने अवसर दिइएको भए पनि फेरि त्यही गतिविधि दोहोरिएको दाबी गरेको छ ।
प्रतिक्रिया दिनुहोस्