काठमाडौं – होटल तथा पर्यटन क्षेत्रलाई प्रदेशस्तरबाटै व्यवस्थित र प्रतिस्पर्धी बनाउने लक्ष्यसहित होटल एसोसिएसन नेपाल (HAN) ले बागमती प्रदेश तदर्थ समिति गठन गरेको छ । शुक्रबार काठमाडौंस्थित जी रामायण होटलमा आयोजित कार्यक्रममा नयाँ समितिको घोषणा गर्दै संगठन विस्तार अभियानलाई थप तीव्र बनाइएको जनाएको हो । बागमती प्रदेश संस्कृति तथा पर्यटन मन्त्रालयका सचिव दीपेन्द्र सुवेदीको प्रमुख आतिथ्यतामा सम्पन्न कार्यक्रममा होटल व्यवसायलाई कानुनी, प्रविधिमैत्री र गुणस्तरीय बनाउन प्रदेशस्तरीय नेतृत्व आवश्यक रहेकोमा जोड दिइयो ।
कार्यवाहक अध्यक्ष प्रवीणबहादुर पाण्डेले अझै पनि उल्लेख्य संख्यामा पर्यटक दर्ता प्रक्रियाबाहिर रहेका होटलमा बस्ने गरेको उल्लेख गर्दै सम्पूर्ण होटललाई कानुनी दायरामा ल्याउन एसोसिएसन सक्रिय रूपमा लाग्ने बताउनुभयो। उहाँका अनुसार काठमाडौं र ललितपुरमा क्षेत्रीय कार्यालय स्थापना गर्ने तयारी भइरहेको छ भने होटल व्यवसायसँग सम्बन्धित पुराना कानुन परिमार्जनका लागि सरकारसँग छलफलसमेत अघि बढाइएको छ । पर्यटकलाई भरपर्दो सेवा र सही सूचना उपलब्ध गराउने उद्देश्यले डिजिटल सूचना प्रणाली सञ्चालन गर्ने योजना पनि एसोसिएसनले अघि सारेको पाण्डेले जानकारी दिए । नवनियुक्त अध्यक्ष रामसुन्दर बकेले होटल व्यवसायीका साझा समस्या समाधान, सेवाको गुणस्तर सुधार र व्यवसायलाई डिजिटल प्रविधिसँग जोड्ने कामलाई प्राथमिकतामा राख्ने प्रतिबद्धता जनाउनुभयो। उहाँले कानुनी रूपमा सञ्चालनमा रहेका होटलको प्रवर्द्धन र व्यवसायीको मनोबल बढाउन समिति सक्रिय रहने बताए । सरकारले हात्ती सफारीमा लगाएको प्रतिबन्धप्रति टिप्पणी गर्दै बकेले वन्यजन्तु संरक्षण र पर्यटन उद्योगबीच सन्तुलन कायम हुने गरी दीर्घकालीन नीति आवश्यक रहेको धारणा राखे ।
कार्यक्रमका प्रमुख अतिथि तथा बागमती प्रदेशका संस्कृति तथा पर्यटन सचिव दीपेन्द्र सुवेदीले धार्मिक, सांस्कृतिक र प्राकृतिक पर्यटनको प्रचुर सम्भावना रहेको बागमती प्रदेशलाई पर्यटनको अग्रणी गन्तव्य बनाउने योजनामा सरकार अघि बढिरहेको बताए। पर्यटन पूर्वाधार, पदमार्ग र सूचना केन्द्र निर्माणमा निजी क्षेत्रसँग सहकार्यलाई प्राथमिकता दिइने उनको भनाइ थियो । कार्यक्रममा होटल एसोसिएसन नेपालका कानुनी सल्लाहकार गान्धी पण्डितले होटल उद्योगले मुलुकको अर्थतन्त्र, विदेशी मुद्रा आर्जन र रोजगारी सिर्जनामा महत्वपूर्ण योगदान पुर्याए पनि राज्यबाट अपेक्षित नीति तथा प्राथमिकता प्राप्त गर्न नसकेको गुनासो गरे ।
नवगठित बागमती प्रदेश तदर्थ समिति
- अध्यक्ष: रामसुन्दर बके
- उपाध्यक्ष: नेत्रजंग थापा
- महासचिव: शिवराज दुवाडी
- कोषाध्यक्ष: लीना खड्का
- सदस्य: समीर लामा, राजाराम सिलवाल र विनोद जिरेल
- सल्लाहकार: घनश्याम श्रेष्ठ, ज्ञानेन्द्रकुमार बिष्ट, प्रेमकान्त श्रेष्ठ र सत्यराम सुवाल
प्रतिक्रिया दिनुहोस्