काठमाडौं – नेपाल बैंक लिमिटेडले आफ्नो स्थापनाको ९०औँ वार्षिकोत्सवको अवसरमा विशेष छुट सुविधासहितको ‘नेपाल बैंक सर्वसुलभ आवास कर्जा योजना’ सार्वजनिक गरेको छ। बैंकले ९० दिनका लागि ल्याएको उक्त योजनाअन्तर्गत ग्राहकले न्यून ब्याजदर र सेवा शुल्कमा घर कर्जा लिन सक्नेछन्। बैंकका अनुसार योजनाअन्तर्गत घर खरिद, नयाँ घर निर्माण, घर मर्मत तथा अपार्टमेन्ट खरिदका लागि कर्जा उपलब्ध हुनेछ। कर्जाको ब्याजदर बैंकको आधार दरमा ०.५ प्रतिशत प्रिमियम थप गरी निर्धारण गरिनेछ। कर्जाको अधिकतम अवधि २५ वर्षसम्म रहनेछ भने सेवा शुल्क ०.२५ प्रतिशत मात्र लाग्नेछ। योजनाअन्तर्गत कर्जा लिने ग्राहकले पाँच लाख रुपैयाँसम्मको आजीवन निःशुल्क क्रेडिट कार्ड सुविधा पाउनेछन्। साथै, लकर सुविधाको वार्षिक शुल्कमा ५० प्रतिशत छुटसमेत उपलब्ध गराइने बैंकले जनाएको छ।
बैंकले सार्वजनिक गरेको यो योजना २०८३ कात्तिक १५ गतेदेखि २०८३ माघ १५ गतेसम्म लागू हुनेछ। नेपाल बैंक लिमिटेड यही कात्तिक ३० गते आफ्नो स्थापनाको ९०औँ वर्षमा प्रवेश गर्दैछ। नेपालको पहिलो बैंकका रूपमा परिचित नेपाल बैंकले देशभरका २३१ शाखा, २५० एटीएम र ५८ विस्तारित काउन्टरमार्फत करिब ३० लाख ग्राहकलाई वित्तीय सेवा प्रदान गर्दै आएको छ। बैंकले आधुनिक बैंकिङ प्रविधिको प्रयोग, दक्ष व्यवस्थापन र युवा जनशक्तिमार्फत ग्राहकलाई छिटोछरितो तथा गुणस्तरीय सेवा प्रदान गर्ने लक्ष्यसहित सेवा प्रवाहलाई निरन्तर सुधार गर्दै आएको जनाएको छ।
प्रतिक्रिया दिनुहोस्