काठमाडौँ — नेपाली कांग्रेसको आसन्न महाधिवेशन नजिकिँदै गर्दा पार्टीभित्र देखिएको गुटगत गतिविधि, अनुशासनहीनता र छाडा बहसबारे नेपाली कांग्रेस सुदूरपश्चिम प्रदेश कमिटीका सदस्य तेज चन्दले कडा टिप्पणी गरेका छन्। आन्तरिक लोकतन्त्रको नाममा चलिरहेको उड्डण्डता, व्यक्तिगत स्वार्थ र गुट–उपगुटले पार्टीको ऊर्जा कमजोर बन्दै गएको उनले चेतावनी दिए। उनका अनुसार यस्तो प्रवृत्तिले नेतृत्वलाई राष्ट्रका गम्भीर मुद्दाबाट टाढा लैजाँदै पार्टीको सामूहिक क्षमता क्षीण बनाउँदै छ।
चन्दले भने, “राजनीति कुनै समूहको शक्ति प्रदर्शन होइन—यो राष्ट्रप्रति निष्ठा, जिम्मेवारी र दूरदृष्टिको परीक्षा हो।” उनले कार्यकर्ता र नेतृत्व दुवैले देशलाई पहिलो प्राथमिकतामा राख्नुपर्ने आवश्यकता औँल्याउँदै थपे, “गुटले नेता बनाउँदैन, दृष्टिले बनाउँछ; स्वार्थले राजनीति चल्दैन, राष्ट्रप्रेमले चल्छ।”
महाधिवेशनको पूर्वसन्ध्यामा आएको चन्दको यस्तो टिप्पणीले संगठनभित्र अनुशासन, एकता र नीतिगत स्पष्टताका विषयमा पुनः बहस शुरु भएको छ। पार्टीभित्र देखिएका मतभेद र आन्तरिक चुनौतीलाई समाधान गर्दै राष्ट्रको भविष्यलाई केन्द्रमा राखेर निर्णय गर्न नेतृत्वलाई उनले आग्रह गरेका छन्। चन्दले महाधिवेशनलाई संगठन सुधार, नयाँ ऊर्जा र जिम्मेवार राजनीतिक संस्कृतितर्फ फर्किने अवसरका रूपमा लिनुपर्ने आवश्यकता पनि दोहोर्याएका छन्।
प्रतिक्रिया दिनुहोस्