दार्चुला — राष्ट्रिय स्वतन्त्र पार्टी (रास्वपा) भित्र पछिल्लो समय बढ्दै गएको असन्तुष्टि अब खुला रूपमा सतहमा आएको छ । पार्टी स्थापना ताकानै जनताको मुद्दालाई मूल एजेन्डा बनाएर काम गर्दै आएका दार्चुलाका संस्थापक नेतामध्येका एक, राजेन्द्र पन्तले नेतृत्वका हालका निर्णयप्रति आपत्ति जनाएका छन् । पन्तका अनुसार, पछिल्लो समय रास्वपामा भित्रिनेहरूको भीडसँगै स्वार्थी, अवसरवादी र पुराना दलका प्रभावशाली नेतासँग मिलेर अकुत सम्पत्ति आर्जन गरेका पात्रहरू समेत प्रवेश गर्न थालेका छन् ।
आफू चोखिन, पुरानो छायाबाट उम्किन र नयाँ आवरणमा देखिनकै लागि धेरै मान्छे रास्वपामा आइपुगेको पन्तको आरोप छ।
पन्तका अनुसार सबैभन्दा गम्भीर समस्या, विधि र प्रक्रियाको अवहेलनासहित कार्यकर्ताको भावना विपरीत ‘माथिबाटै’ पदाधिकारी नियुक्ति हुने क्रम तीव्र हुनु हो। “पार्टी स्थापना कालदेखि खटिएका, जनताबीच काम गरेका कार्यकर्ताको मेहनतको कदर छैन । पार्टी चुनाव–केन्द्रित हुँदै जाँदा मूल मर्म नै हराउँदै गएको छ,” पन्तले भने, उनले थपे “हामीलाई चुनाव जित्नु ठूलो कुरा होइन। जनताको नजिक को छ ? जनताको मुद्दा कसले उठाइरहेको छ ? त्यो नै सबभन्दा महत्वपूर्ण हो।”
पुरानो राजनीतिक संस्कारबाट लाभ उठाइसकेकाहरूलाई पार्टीले पद बाँडिरहेकोप्रति पन्तले चर्को असन्तुष्टि व्यक्त गरे। “जनताको कुरा नबोलेका, पार्टीको विचार र सिद्धान्त नबुझ्ने व्यक्तिलाई दैनिकजसो टीका लगाएर पद बाँड्ने काम भइरहेको छ। यो न्यायसंगत व्यवहार होइन,” उनले भने ।
पन्तले आफूले नेतृत्वलाई सबै त्रुटि सुधार गर्न आग्रह गरिसकेको बताउँदै भने, “हामी पुराना दलबाट लाभ उठाइसकेकाहरूको होइन, जनताको मर्म बुझ्ने नयाँ अनुहारको पक्षमा छौँ। स्वार्थका लागि प्रवेश गरेका, आफू चोखिन आएका व्यक्तिलाई मैले कुनै पनि सहयोग गर्नेछैन।” राजेन्द्र पन्त रास्वपा दार्चुलाका संस्थापक नेतामध्ये एक हुन्। उनी शैल्यशिखर नगरपालिकाको नगर सचिव हुँदै जिल्ला उपसभापति बनेका थिए। हाल उनी पार्टीको साधारण सदस्य छन्। दार्चुलामा पार्टी संगठन निर्माणमा उनको ठूलो योगदान रहेको छ ।
प्रतिक्रिया दिनुहोस्