काठमाडौँ – भक्तपुरको रानीकोटस्थित भिलेज हाईल्याण्ड रिसोर्ट दक्षिण एशियाकै प्रतिष्ठित पर्यटन तथा आतिथ्य क्षेत्रको अवार्ड कार्यक्रम साउथ एशियन ट्राभल अवार्ड्स २०२६ का लागि मनोनयनमा परेको छ ।
दक्षिण एशियाली पर्यटन तथा होटल उद्योगमा विशेष प्रतिष्ठा राख्ने साटा अवार्डले हरेक वर्ष उत्कृष्ट होटल, रिसोर्ट, ट्राभल कम्पनी तथा पर्यटन व्यवसायलाई सम्मान गर्दै आएको छ । यस वर्ष नेपालबाट भिलेज हाईल्याण्ड रिसोर्टको मनोनयनलाई नेपाली पर्यटन क्षेत्रकै महत्वपूर्ण उपलब्धिका रूपमा हेरिएको छ ।
रिसोर्टका सञ्चालक रामसुन्दर बकेका अनुसार अन्तर्राष्ट्रियस्तरको अवार्डमा नेपाली रिसोर्टको उपस्थिति बलियो बन्दै जानु नेपालको पर्यटन प्रवर्द्धन, आतिथ्य सेवा र अन्तर्राष्ट्रिय पहिचान विस्तारका दृष्टिले सकारात्मक संकेत हो । उनले नेपाली पर्यटन उद्योगले पछिल्ला वर्षहरूमा गुणस्तरीय सेवा, प्राकृतिक अनुभव र सांस्कृतिक आतिथ्यलाई प्राथमिकतामा राख्दै विश्व बजारमा आफ्नो स्थान विस्तार गर्दै गएको बताए । भक्तपुरको सूर्यविनायक नगरपालिका–८ र काभ्रेको पनौती नगरपालिका–१ को संगमस्थल रानीकोटमा अवस्थित रिसोर्ट प्राकृतिक सौन्दर्य, शान्त वातावरण र पारिवारिक आतिथ्य सेवाका कारण आन्तरिक तथा बाह्य पर्यटकबीच लोकप्रिय बन्दै गएको छ । रिसोर्टबाट काठमाडौँ उपत्यकासहित लाङटाङ हिमशृंखलासम्मको मनोरम दृश्य अवलोकन गर्न सकिन्छ ।
रिसोर्ट परिसरमा पदयात्रा, प्रकृति अवलोकन, चराचुरुङ्गी अवलोकन तथा गाउँ पर्यटनको अनुभव लिन सकिने व्यवस्था रहेको छ । साथै ऐतिहासिक रानीकोट किल्लासहित आसपासका धार्मिक, सांस्कृतिक तथा प्राकृतिक सम्पदाको अवलोकन गर्न सकिने भएकाले यो क्षेत्र छोटो दूरीमै प्रकृति, इतिहास र ग्रामीण जीवनशैली अनुभव गर्न चाहने पर्यटकका लागि आकर्षक गन्तव्यका रूपमा विकसित हुँदै गएको छ । व्यवस्थापनका अनुसार रिसोर्टमा आधुनिक सुविधासहित आरामदायी आवास, स्थानीय तथा अन्तर्राष्ट्रिय परिकार, पारिवारिक वातावरण र पर्यटकमैत्री सेवा उपलब्ध छन् । रिसोर्टले आफ्नो आधिकारिक सामाजिक सञ्जालमार्फत साटा २०२६ को मनोनयनबारे जानकारी दिँदै शुभेच्छुक तथा समर्थकलाई अनलाइन मतदानमार्फत साथ दिन आग्रहसमेत गरेको छ ।
साउथ एशियन ट्राभल अवार्ड्स सन् २०१६ देखि सञ्चालन हुँदै आएको दक्षिण एशियाली पर्यटन तथा आतिथ्य क्षेत्रको प्रतिष्ठित अन्तर्राष्ट्रिय अवार्ड कार्यक्रम हो । नेपाल, भारत, श्रीलंका, माल्दिभ्स, भुटान तथा बंगलादेशलगायत मुलुकका होटल, रिसोर्ट, ट्राभल कम्पनी तथा पर्यटन व्यवसायबीच प्रतिस्पर्धा हुने यस अवार्डलाई दक्षिण एशियाली पर्यटन उद्योगको महत्वपूर्ण मञ्चका रूपमा लिइन्छ । भिलेज हाईल्याण्ड रिसोर्टको मनोनयनले नेपाली पर्यटन उद्योगको अन्तर्राष्ट्रिय उपस्थिति र सम्भावनालाई थप उजागर गरेको पर्यटन व्यवसायीहरूको विश्वास छ ।
प्रतिक्रिया दिनुहोस्