काठमाडौं – नाडा अटोमोबाइल्स एसोसिएसन अफ नेपालको प्रतिनिधिमण्डलले अध्यक्ष सुरेन्द्रकुमार उप्रेती को नेतृत्वमा आइतबार उपत्यका ट्राफिक प्रहरी कार्यालयका नवनियुक्त प्रमुख सुरेशप्रसाद काफ्ले सँग भेट गरी काठमाडौं उपत्यकाको ट्राफिक व्यवस्थापनसँग सम्बन्धित विभिन्न विषयमा छलफल गरेको छ ।
असार १ गते भएको भेटवार्तामा ट्राफिक व्यवस्थापनलाई प्रभावकारी बनाउन दीर्घकालीन र सिर्जनात्मक सहकार्य आवश्यक रहेकोमा जोड दिइएको थियो। कार्यालय प्रमुख काफ्लेले ट्राफिक व्यवस्थापन सुधारका लागि निजी क्षेत्र र सम्बन्धित निकायबीच सहकार्य आवश्यक रहेको बताउँदै ट्राफिक सचेतनामूलक कार्यक्रम सञ्चालन गर्न नाडालाई आग्रह गरेका छन् । छलफलका क्रममा उनले राजधानीमा एआई (Artificial Intelligence) प्रविधियुक्त ट्राफिक लाइट व्यवस्थापनको पहल आवश्यक रहेको उल्लेख गर्दै सवारी प्रयोगकर्तामा ट्राफिक अनुशासन अभिवृद्धि गर्न नयाँ उपाय अपनाउनुपर्ने धारणा राखे। साथै, सवारी साधन खरिद गर्ने ग्राहक, सर्भिस सेन्टरसँग सम्बन्धित व्यक्ति तथा पहिलो पटक लाइसेन्स लिने व्यक्तिलाई उपत्यका ट्राफिक प्रहरी कार्यालयमार्फत छोटो अवधिको ट्राफिक अभिमुखीकरण तालिम सञ्चालन गर्न सकिने प्रस्ताव पनि अघि सारे ।
त्यस अवसरमा नाडा अध्यक्ष उप्रेतीले ट्राफिक प्रहरीसँग विगतदेखि हुँदै आएको सहकार्यलाई निरन्तरता दिने प्रतिबद्धता व्यक्त गरे। उनले नाडाको आगामी ५०औँ वार्षिक साधारण सभा तथा स्वर्ण उत्सव अन्तर्गत असार १३ देखि १९ गतेसम्म राजधानीमा सप्ताहव्यापी कार्यक्रम आयोजना गरिने जानकारी दिँदै कार्यक्रम सफल बनाउन ट्राफिक प्रहरीको सहयोग आवश्यक रहेको बताए । उप्रेतीले नाडाले स्टिकर अभियानमार्फत ट्राफिक जनचेतना कार्यक्रम सञ्चालन गर्ने तयारीसमेत रहेको जानकारी दिएका छन् । छलफलमा नाडाका महासचिव मिलनबाबु मल्ल, उपाध्यक्ष विक्रम सिंहानिया, सचिव मेघराज पौडेल तथा कोषाध्यक्ष पंकज अग्रवाल लगायतको सहभागिता रहेको थियो ।
प्रतिक्रिया दिनुहोस्