काठमाडौं – राष्ट्रिय स्वतन्त्र पार्टी (रास्वपा)का सभापति रवि लामिछाने ले जाँचबुझ आयोगमा दिएको बयानमा भदौ २४ गतेको घटनामा आफ्नो पार्टीको कुनै संलग्नता नरहेको बताएका छन् । आयोगको प्रतिवेदनमा समेटिएको बयानअनुसार लामिछानेले आफू र पार्टी दुवै भोलिपल्ट भएका विध्वंसात्मक गतिविधिमा संलग्न नभएको स्पष्ट पारेका छन् । साथै, यदि कसैको संलग्नता प्रमाणित भए कडा कारबाही गर्न आफू तयार रहेको प्रतिबद्धता पनि उनले व्यक्त गरेका छन् ।
‘म भागेको होइन’
बयानका क्रममा लामिछानेले आफू नख्खु कारागारबाट भागेको भन्ने आरोप अस्वीकार गर्दै कारागार प्रशासनकै आग्रहमा बाहिर जान बाध्य भएको जिकिर गरेका छन् । उनका अनुसार सुरक्षाको अवस्था कमजोर बन्दै गएपछि सुरक्षाकर्मीहरूले नै उनलाई बाहिर निस्कन अनुरोध गरेका थिए । ‘मैले अदालतको आदेश बिना कारागारबाट बाहिर निस्कन अस्वीकार गरें,’ उनले बयानमा भनेका छन्, ‘तर प्रहरी आत्तिएको अवस्थामा भीडले मलाई धकेल्दै बाहिर पुर्यायो।’
भीडलाई शान्ति अपिल
लामिछानेका अनुसार कारागारबाट बाहिरिएपछि उनी नजिकैको एक रेस्टुरेन्टको बार्दलीमा चढेर भीडलाई शान्त रहन, संयमता अपनाउन र सार्वजनिक सम्पत्तिको संरक्षण गर्न आग्रह गरेका थिए ।उनले आफूलाई कारागार प्रशासनकै निर्देशनमा भीडको जिम्मा लगाइएको जस्तो अवस्था सिर्जना भएको दाबी गर्दै आफू नचाहँदा नचाहँदै बाहिर पठाइएको बताएका छन् ।
लामिछानेको बयानको पूर्णपाठ
मिति २०८२ भाद्र २३ गतेसम्म कारागारको अवस्था सामान्य नै थियो । तर भदौ २४ गते करिब दिउँसो साढे १२ बजे कारागारका नाइकेहरूले मलाई कार्यालयमा बोलाई सुरक्षा निकायका प्रतिनिधिहरूले कारागार बाहिर असामान्य अवस्था सिर्जना भएको, ठूलो भीड जम्मा भएको र मलाई परिवार तथा पार्टीको जिम्मा लगाइ बाहिर पठाउनुपर्ने अवस्था आएको जानकारी गराए ।
मैले अदालतको आदेशबिना कारागारबाट बाहिर निस्कन अस्वीकार गरें । तथापि, जेल प्रशासनले भीडलाई म स्वयंले सम्झाउन सक्ने भन्दै पटक-पटक आग्रह गरेपछि म कारागार प्राङ्गणमै रहेर भीडलाई सम्बोधन गर्न तयार भएँ र माइकको व्यवस्था गर्न भनें ।
प्रहरी आत्तिएको अवस्थामा भीडले मलाई धकेल्दै बाहिर पुर्यायो । त्यसपछि म कारागार छेउको रेस्टुरेन्टको बार्दलीमा चढी भीडलाई शान्ति, संयमता अपनाउन र सार्वजनिक सम्पत्तिको संरक्षण गर्न अपिल गर्दै सम्बोधन गरें ।
कारागार प्रशासनले मलाई औपचारिक रूपमा थुनामुक्त गर्ने पत्र दिने तयारी गरेको रहेछ, तर पत्र तयार नहुँदै भीडले मलाई कारागार बाहिर लगे । पछि मैले कारागारबाट पत्र आएको जानकारी पाएँ, तर त्यसमा हस्ताक्षर गर्ने वा लेखन प्रक्रियामा मेरो कुनै सहभागिता थिएन, त्यसैले सो पत्रको सम्बन्धमा जेल प्रशासन स्वयं जवाफदेही हुनुपर्छ भन्ने मेरो धारणा हो । वास्तवमा मलाई कारागार प्रशासनकै निर्देशनमा भीडको जिम्मा लगाइयो र म निस्किन नचाहँदा नचाहँदै जबरजस्ती बाहिर पठाइयो । भदौ २४ को घटनामा मेरो र मेरो पार्टीको संलग्नता नरहेको स्पष्ट पार्दै मैले र राष्ट्रिय स्वतन्त्र पार्टीले कुनै पनि हिंसात्मक क्रियाकलापमा प्रत्यक्ष वा अप्रत्यक्ष भूमिका नखेलेको जनाएका छौं, र यदि कोही संलग्न भेटिए कडा कारबाही गरिनेछ भन्ने प्रतिबद्धता व्यक्त गरिएको छ । कारागारबाट बाहिरिएपछि शुभेच्छुकहरूको सहयोगमा कलाकार रामकृष्ण ढकालको गाडीमार्फत म सुरक्षित स्थानमा पुगेँ र तत्काल नेपाल प्रहरी, सशस्त्र प्रहरी तथा नेपाली सेनाका प्रमुखहरूलाई आफ्नो अवस्थाबारे जानकारी गराएँ । सोही साँझ मैले भिडियो सन्देशमार्फत पनि जनतालाई ‘म सुरक्षित छु र अदालतमा पुनः उपस्थित हुनेछु’ भन्ने जानकारी दिएँ । मिति भदौ २८ गते सुरक्षाको प्रत्याभूति पाएपछि म पुनः नख्खु कारागार फर्किएँ ।
यस घटनाक्रमबाट सिक्दै कारागार सुधारका लागि खुला कारागार नीति अवलम्बन गर्नुपर्ने, कैदीबन्दीको मानसिक स्वास्थ्य तथा कानूनी परामर्श प्रणाली सुदृढ गर्नुपर्ने र कैदी पुनर्समीक्षा संयन्त्र स्थापना गर्नुपर्ने सुझाव म राख्दछु ।
प्रतिक्रिया दिनुहोस्