Skip to content

अमेरिका–इरान तनाव चर्किँदा विश्व अर्थतन्त्रमा असर, तेलको मूल्य बढ्यो

Nepal Bank

तेहरान – पश्चिम एसियामा अमेरिका र इरानबीच बढ्दो सैन्य तनावले क्षेत्रीय सुरक्षा मात्र नभई विश्व राजनीति र अर्थतन्त्रमा समेत प्रभाव पार्न थालेको छ। पछिल्लो २४ घण्टामा भएका सैन्य आक्रमण, प्रतिआक्रमण र चेतावनीपछि मध्यपूर्वको तनाव थप गहिरिएको छ । इरानको खातम अल–अन्बिया सेन्ट्रल हेडक्वाटरका प्रवक्ता कर्नल इब्राहिम जोल्फघारीले इरानी सेनाले पश्चिम एसियामा रहेका अमेरिकी सैन्य आधारहरूलाई लक्षित गरी मिसाइल तथा ड्रोन आक्रमण गरेको पुष्टि गरेका छन् । इरानले दक्षिणी क्षेत्रमा भएका अमेरिकी आक्रमणको जवाफस्वरूप अमेरिकी सैन्य आधारहरूमा आक्रमण गरिएको जनाएको छ ।

अमेरिकी सैन्य आधारमा ठूलो क्षति पुगेको इरानको दाबी

जोल्फघारीले इरानी आक्रमणबाट अमेरिकी सैन्य पूर्वाधार तथा हतियारमा ठूलो क्षति पुगेको दाबी गरेका छन्। उनका अनुसार आक्रमणमा अमेरिकी कमाण्डर तथा सैनिकहरू समेत हताहत भएका छन्। उनले अमेरिकाले आफूले गरेको कारबाहीप्रति पश्चात्ताप नगरेसम्म इरानका आक्रमण जारी रहने चेतावनी दिएका छन्। इरानले अमेरिकालाई सहयोग गर्ने अन्य मुलुकलाई समेत गम्भीर परिणाम भोग्नुपर्ने चेतावनी दिएको छ। यसले अमेरिका–इरान तनाव थप क्षेत्रीय द्वन्द्वतर्फ जाने जोखिम बढाएको छ।

अन्तर्राष्ट्रिय बजारमा कच्चा तेलको मूल्य उकालो

अमेरिका र इरानबीचको प्रत्यक्ष सैन्य भिडन्तका कारण विश्व बजारमा कच्चा तेलको आपूर्ति प्रभावित हुन सक्ने आशंका बढेको छ। यही चिन्ताका कारण अन्तर्राष्ट्रिय बजारमा तेलको मूल्य बढेको छ। बुधबारको प्रारम्भिक कारोबारमा ब्रेन्ट क्रुडको मूल्य प्रतिब्यारेल ८७ सेन्ट अर्थात् ०.९२ प्रतिशतले बढेर ९५.५२ अमेरिकी डलर पुगेको छ। त्यस्तै, अमेरिकी वेस्ट टेक्सस इन्टरमिडिएट (डब्लूटीआई) को मूल्य प्रतिब्यारेल ८० सेन्ट अर्थात् ०.८९ प्रतिशतले बढेर ९१.०२ डलर पुगेको छ। मध्यपूर्वमा तनाव तत्काल कम हुने संकेत नदेखिएकाले आगामी दिनमा तेलको मूल्य थप बढ्न सक्ने विश्लेषकहरूले बताएका छन्। लामो समयसम्म सैन्य तनाव कायम रहे विश्वव्यापी ऊर्जा आपूर्ति र मूल्यमा थप दबाब पर्न सक्ने उनीहरूको आकलन छ।

बहराइनमा दोस्रोपटक सुरक्षा सतर्कता 

यसैबीच बढ्दो क्षेत्रीय जोखिमलाई ध्यानमा राख्दै बहराइनको गृह मन्त्रालयले दोस्रोपटक सुरक्षा सतर्कता जारी गरेको छ। मन्त्रालयले आफ्ना नागरिक तथा बासिन्दालाई सम्भावित खतराबाट जोगिन शान्त रहन र आवश्यक परेको अवस्थामा नजिकैको सुरक्षित स्थानमा जान आग्रह गरेको छ। सामाजिक सञ्जाल ‘एक्स’मार्फत सूचना जारी गर्दै मन्त्रालयले सार्वजनिक सुरक्षासम्बन्धी जानकारीका लागि आधिकारिक माध्यमबाट आउने सूचनालाई मात्र पछ्याउन आग्रह गरेको छ।

क्षेत्रीय युद्धको जोखिम बढ्यो

अमेरिका र इरानबीचको पछिल्लो सैन्य टकरावले मध्यपूर्वमा व्यापक युद्धको जोखिम बढाएको छ। तनाव अन्य मुलुकसम्म फैलिन सक्ने सम्भावनालाई लिएर अन्तर्राष्ट्रिय समुदाय चिन्तित बनेको छ। क्षेत्रीय अस्थिरता नियन्त्रण गर्न कूटनीतिक पहल गर्नुपर्ने दबाबसमेत बढ्दै गएको छ। अमेरिका–इरान तनाव थप विस्तार भए त्यसको असर मध्यपूर्वको सुरक्षा, विश्वव्यापी ऊर्जा बजार तथा अन्तर्राष्ट्रिय अर्थतन्त्रमा गम्भीर रूपमा पर्न सक्ने देखिएको छ।

प्रतिक्रिया दिनुहोस्