सुर्खेत – राजनीतिबाट उद्यमशीलतामा फड्को मारेकी नेकपा (एमाले) नेतृ तथा पूर्वसांसद शान्ता चौधरीको ‘शान्ताको अचार’ व्यवसायले कर्णाली प्रदेशको राजधानी वीरेन्द्रनगरमा नयाँ शाखा विस्तार गरेको छ ।
शुक्रबार एक औपचारिक कार्यक्रमबिच वीरेन्द्रनगरस्थित सनिहल लाइनमा उक्त शाखाको उद्घाटन गरिएको हो । उद्घाटन कार्यक्रममा बोल्दै चौधरीले ‘शान्ताको अचार’लाई देशव्यापी ब्राण्डका रूपमा स्थापित गरिने बताइन् ।
छोटो समयमै ‘शान्ताको अचार’ ले लोकप्रियता हासिल गरेकोमा खुसी व्यक्त गरिन् । उनका अनुसार, नेपालगञ्जमा शाखा विस्तार भइसकेको छ भने अब बुटवल र धनगढीमा पनि नयाँ आउटलेट खोल्ने तयारी भइरहेको छ । ‘शान्ताको अचार’ले केवल व्यावसायिक सफलता मात्र नभई सामाजिक उत्तरदायित्व पनि बोकेको छ,’ उनले थपिन्, ‘अहिले प्रत्यक्ष रूपमा हाम्रो उद्योगमा ३५ जनाले रोजगारी पाएका छन्, जसमा एक जना पुरुषबाहेक सबै दिदीबहिनीहरू हुनुहुन्छ ।’
उनले यसलाई महिला सशक्तीकरणको ज्वलन्त उदाहरणका रूपमा प्रस्तुत गरिन् । यसका साथै अप्रत्यक्ष रूपमा यसले सयौँ किसानलाई पनि लाभ पुर्याइरहेको छ । स्थानीय किसानका मुला, काँक्रो, लसुन, खुर्सानीलगायत उत्पादनहरू सीधै खरिद गरेर अचार बनाइने हुँदा बजारको सुनिश्चितता भई उनीहरूलाई आर्थिक टेवा पुगेको चौधरीले स्पष्ट पारिन् । यसरी ‘शान्ताको अचार’ले स्थानीय उत्पादनको प्रवर्द्धन गर्दै ग्रामीण अर्थतन्त्रलाई चलायमान बनाउनसमेत मद्दत पुर्याएको उनको भनाइ छ । उनका अनुसार आर्थिक रूपमा पनि यो उद्योगले सफलता प्राप्त गइरहेको छ । मासिक १० देखि ३० लाख रुपैयाँसम्मको कारोबार गर्दै आएको ‘शान्ताको अचार’ नेपालको घरेलु बजारमा मात्र सीमित छैन । यसलाई एक प्रतिष्ठित ब्रान्डका रूपमा स्थापित गर्न चौधरी सक्रिय छिन् र उनको यो प्रयासले सार्थकता पाएको छ– अहिले ‘शान्ताको अचार’ विदेशका विभिन्न मुलुकसम्म पुगेको छ । उद्योगले हाल भेज र ननभेज गरी कुल २२ प्रकारका विभिन्न अचारका परिकारहरू उत्पादन गर्दै आएको उनले बताइन् । गुणस्तरीय र स्वस्थकर अचार उत्पादनमा विशेष ध्यान दिएकाले नै यो छोटो समयमा लोकप्रिय बन्न सफल भएको चौधरीको दाबी छ । राजनीतिक पृष्ठभूमिबाट व्यवसायमा आउँदा सुरुमा केही संशय र डर रहेको चौधरी स्विकार्छिन् । ‘सुरुमा शान्ताको अचार सुन्नासाथ कतै यसलाई एमालेको अचार भनेर राजनीतिसँग जोडेर हेर्ने हो कि भन्ने डर थियो,’ उनले भनिन्, ‘तर समयसँगै यो डर निर्मुल हुँदै गयो । मानिसहरूले मलाई राजनीतिक नेतृका रूपमा भन्दा पनि एक सफल उद्यमीका रूपमा स्वीकार गर्दै शान्ताको अचारलाई मन पराइदिनुभयो ।’ उनको यो पहलको प्रशंसा अहिले सबै राजनीतिक दलका नेताहरूले गर्ने गरेको पनि उनले सुनाइन् । यो उद्यमशीलताले राजनीतिभन्दा माथि उठेर सबैको मन जित्न सफल भएको उनको भनाइ छ । चौधरीले २०८० साल माघ महिनादेखि दाङको घरेलु तथा साना उद्योग कार्यालयमा विधिवत् दर्ता गरेर यो अचार उद्योग सञ्चालनमा ल्याएकी थिइन् ।
प्रतिक्रिया दिनुहोस्