काठमाडौँ – नवनिर्वाचित राष्ट्रिय सभा सदस्यहरूले पद तथा गोपनीयताको शपथ ग्रहण गर्नुभएको छ । राष्ट्रिय सभाका अध्यक्ष नारायणप्रसाद दाहालले सोमबार निर्वाचित सदस्यहरूलाई शपथ गराउनुभएको हो ।
गत माघ ११ गते भएको राष्ट्रिय सभाको निर्वाचनबाट १८ जना सदस्य निर्वाचित हुनुभएको थियो । ५९ सदस्यीय राष्ट्रिय सभामा एक तिहाइ सदस्यका लागि प्रत्येक दुई वर्षमा निर्वाचन हुने व्यवस्था छ । सोही व्यवस्थाअनुसार फागुन २० गते १९ जना सदस्यको कार्यकाल सकिएको थियो । तीमध्ये १८ जनाको निर्वाचन भइसकेको छ भने एक जना सदस्यलाई सरकारको सिफारिसमा राष्ट्रपतिले मनोनयन गर्ने व्यवस्था छ ।
निर्वाचनमा नेपाली कांग्रेसका ९ जना, नेकपा (एमाले) का ८ जना र लोकतान्त्रिक समाजवादी पार्टी (लोसपा) का एक जना सदस्य निर्वाचित हुनुभएको छ । नवनिर्वाचित सदस्यहरूको कार्यकाल फागुन २१ गतेबाट सुरु भएको छ ।
नवनिर्वाचित सदस्यहरूको संक्षिप्त परिचय
महन्थ ठाकुर
लोकतान्त्रिक समाजवादी पार्टी (लोसपा) का अध्यक्ष महन्थ ठाकुर मधेस प्रदेशबाट राष्ट्रिय सभा सदस्यमा निर्वाचित हुनुभएको हो । नेपाली कांग्रेसबाट राजनीतिक यात्रा सुरु गर्नुभएका ठाकुर कांग्रेसको कोषाध्यक्षसमेत बन्नुभएको थियो । २०६२/६३ को मधेस आन्दोलनपछि उहाँ मधेसकेन्द्रित राजनीतिमा सक्रिय हुनुभयो । उहाँ २०४८ सालमा सर्लाही क्षेत्र नम्बर ५ बाट प्रतिनिधि सभा सदस्यमा निर्वाचित भई उपसभामुखसमेत बन्नुभएको थियो ।
सुनीलबहादुर थापा
कोशी प्रदेशबाट निर्विरोध निर्वाचित सुनीलबहादुर थापा यसअघि राष्ट्रपति रामचन्द्र पौडेलका राजनीतिक सल्लाहकार हुनुहुन्थ्यो । राष्ट्रिय प्रजातन्त्र पार्टीबाट राजनीति सुरु गर्नुभएका थापा हाल नेपाली कांग्रेसमा हुनुहुन्छ । उहाँ २०७० सालमा धनकुटा क्षेत्र नम्बर–२ बाट संविधान सभा सदस्यमा निर्वाचित हुनुभएको थियो र २०७४ सालमा वाणिज्य तथा आपूर्ति मन्त्री बन्नुभएको थियो ।
रामकुमारी झाँक्री
लुम्बिनी प्रदेशबाट निर्वाचित रामकुमारी झाँक्री प्रतिनिधि सभाकी पूर्वसदस्य तथा पूर्वसहरी विकास मन्त्री हुनुहुन्छ । २०७४ मा नेकपा (एमाले) बाट समानुपातिक सांसद बन्नुभएकी उहाँ एमाले विभाजनपछि एकीकृत समाजवादीमा जानुभएको थियो । पछि पुनः एमालेमा फर्किएपछि पार्टीले उहाँलाई राष्ट्रिय सभा सदस्यको उम्मेदवार बनाएको हो ।
ललितजंग शाही
नेपाली कांग्रेसका तर्फबाट कर्णाली प्रदेशबाट निर्वाचित ललितजंग शाही २०७० सालमा जुम्लाबाट संविधान सभा सदस्य बन्नुभएको थियो । उहाँ नेपाली कांग्रेस कर्णाली प्रदेशका सभापतिसमेत हुनुहुन्छ ।
रोशनी मेचे
कोशी प्रदेशबाट नेकपा (एमाले) का तर्फबाट निर्वाचित रोशनी मेचे सीमान्तकृत मेचे समुदायकी प्रतिनिधि हुनुहुन्छ । उहाँले तत्कालीन प्रधानमन्त्री केपी शर्मा ओलीको सचिवालयमा रहेर काम गर्नुभएको थियो ।
धमेन्द्र पासवान
मधेस प्रदेशबाट निर्वाचित धमेन्द्र पासवान दलित अधिकारकर्मी हुनुहुन्छ । नेपाली कांग्रेसले उहाँलाई राष्ट्रिय सभा सदस्य बनाएको हो । उहाँ नेपाल दलित सङ्घका पूर्वमहासचिवसमेत हुनुहुन्छ ।
रञ्जित कर्ण
मधेस प्रदेशबाट निर्वाचित रञ्जित कर्ण नेपाल विद्यार्थी सङ्घ (नेविसङ्घ) का पूर्वकेन्द्रीय अध्यक्ष हुनुहुन्छ । उहाँ २०७० सालमा संविधान सभा सदस्यसमेत बन्नुभएको थियो ।
रेखा झा
नेकपा (एमाले) बाट मधेस प्रदेश प्रतिनिधित्व गर्ने रेखा झा अर्थशास्त्र र समाजशास्त्रमा स्नातक हुनुहुन्छ । उहाँ मानव अधिकार र सामाजिक न्यायका क्षेत्रमा सक्रिय रहँदै आउनुभएको छ ।
सोम पोर्तेल
कोशी प्रदेशको दलित क्लस्टरबाट निर्वाचित सोम पोर्तेल २०७४ देखि २०७९ सम्म झापा जिल्ला समन्वय समितिको प्रमुख हुनुहुन्थ्यो ।
डा. प्रेम दंगाल
बागमती प्रदेशबाट निर्वाचित डा. प्रेम दंगाल नेकपा (एमाले) का केन्द्रीय सदस्य तथा अखिल नेपाल किसान महासङ्घका केन्द्रीय अध्यक्ष हुनुहुन्छ । उहाँले ग्रामीण अर्थतन्त्र र खाद्य सम्प्रभुतामा विद्यावारिधि गर्नुभएको छ ।
गीता देवकोटा
बागमती प्रदेशबाट नेपाली कांग्रेसका तर्फबाट निर्वाचित गीता देवकोटा नेपाल विद्यार्थी सङ्घमार्फत राजनीति सुरु गर्नुभएको हो । उहाँ नेपाली कांग्रेसको केन्द्रीय सदस्यसमेत हुनुहुन्छ ।
जगत तिमिल्सिना
गण्डकी प्रदेशबाट निर्वाचित जगत तिमिल्सिना त्रिभुवन विश्वविद्यालय व्यवस्थापन विभागका प्राध्यापक हुनुहुन्छ । उहाँ प्रजातान्त्रिक प्राध्यापक सङ्घका अध्यक्षसमेत रहनुभएको छ ।
सम्झना देवकोटा
गण्डकी प्रदेशबाट निर्वाचित एमाले नेतृ सम्झना देवकोटाले यसअघि स्थानीय तहका विभिन्न निर्वाचनमा प्रतिस्पर्धा गर्नुभएको थियो । २०८२ सालमा भएको कांग्रेस–एमाले गठबन्धनका कारण उहाँ राष्ट्रिय सभा सदस्य बन्न सफल हुनुभयो ।
मिना रखाल
कर्णाली प्रदेशबाट निर्वाचित एमाले नेतृ मिना रखाल २०७४ सालमा समानुपातिकतर्फबाट कर्णाली प्रदेश सभा सदस्य बन्नुभएको थियो ।
चन्द्रबहादुर केसी
लुम्बिनी प्रदेशबाट निर्वाचित चन्द्रबहादुर केसी गुल्मी जिल्लाको राजनीतिमा लामो समयदेखि सक्रिय नेता हुनुहुन्छ । उहाँ २०४९ सालमा जिल्ला विकास समिति गुल्मीको सभापति बन्नुभएको थियो ।
वासुदेव जंगली
दाङका वासुदेव जंगली नेपाली कांग्रेसका पुराना नेता हुनुहुन्छ । उहाँलाई कांग्रेसले अपाङ्गता कोटाबाट राष्ट्रिय सभा सदस्य बनाएको हो ।
खम्मबहादुर खाती
सुदूरपश्चिम प्रदेशबाट निर्वाचित खम्मबहादुर खाती नेपाल बार एसोसिएसनका पूर्वमहासचिव तथा पूर्वमहान्यायाधिवक्ता हुनुहुन्छ । उहाँ वरिष्ठ अधिवक्तासमेत हुनुहुन्छ ।
लीलाकुमारी भण्डारी
सुदूरपश्चिम प्रदेशबाट निर्वाचित लीलाकुमारी भण्डारी २०६४ सालको पहिलो संविधान सभा निर्वाचनमा कैलाली क्षेत्र नम्बर ६ बाट प्रत्यक्ष निर्वाचित हुनुभएको थियो ।
राष्ट्रिय सभा सदस्य निर्वाचनमा नेपाली कांग्रेस, नेकपा (एमाले) र लोकतान्त्रिक समाजवादी पार्टीबीच गठबन्धन भएको थियो भने नेपाली कम्युनिस्ट पार्टी एक्लै प्रतिस्पर्धामा रहेको थियो । निर्वाचनमा प्रदेश सभा सदस्य तथा स्थानीय तहका प्रमुख र उपप्रमुख मतदाता हुने व्यवस्था छ ।
प्रतिक्रिया दिनुहोस्