काठमाडौँ — नेपाली कांग्रेसको आन्तरिक जीवन पछिल्ला दिनमा अस्वाभाविक रूपमा तनावपूर्ण बन्दै गएको छ। पार्टी सभापति शेरबहादुर देउवामाथि व्यक्तिगत तथा संस्थागत रूपमा प्रहार भइरहेका बेला उहाँले अपनाइरहनुभएको धैर्य, संयमता र उदार शैलीलाई नेवि संघ नेतृ गीता गुरुङले “पार्टी एकतालाई जोगाउने परिपक्व नेतृत्व” भन्दै प्रशंसा गरेकी छन्।
गुरुङका अनुसार, देउवामाथि भइरहेको निरन्तर आक्रमण कुनै स्वस्थ लोकतान्त्रिक अभ्यास होइन। महामन्त्री गगन थापा समूहका पदाधिकारीहरूले प्रयोग गरेको “ब्याक गियर हुन्न” र “देउवाले कांग्रेसलाई फुटतिर धकेल्दै छन्” जस्ता अभिव्यक्तिले पार्टीभित्र असहिष्णुता र अस्वस्थ प्रतिस्पर्धा बढेको उनको टिप्पणी छ।
उनले भनिन्, “आफैंले दिएको बचनबाट पछि हट्दै सभापतिमाथि दिनदिनै प्रहार गर्नु जिम्मेवार नेतृत्वको लक्षण होइन। पार्टीमा भएका मतभेद समाधान गर्न संवाद र प्रक्रियागत बाटो अवलम्बन गर्नु लोकतान्त्रिक संस्कार हो।”
सभापति देउवाले चाहिँ कुनै पनि आक्रमणको जवाफ आक्रामक शैलीमा नदिएको, न त निलम्बन वा कारबाहीको बाटो अपनाएको विषयलाई गुरुङले विशेष जोड दिइन्। “देउवाको संयमता कमजोरी होइन, पार्टी एकतालाई जोगाउने राजनीतिक परिपक्वता हो,” उनले भनिन्। उनका अनुसार, पार्टीलाई अहिले आवश्यक विशेष महाधिवेशन होइन, नियमित महाधिवेशनमार्फत नेतृत्वको वैधता र संगठनको सुदृढिकरण हो। “इतिहासले देखाएको छ—अतिवादी राजनीति र व्यक्तिगत महत्वाकाङ्क्षाले कहिल्यै संगठन बलियो बनाउँदैन, बरु फुटको बीउ रोप्छ,” गुरुङको चेतावनी छ। गुरुङले महामन्त्रीहरू र उनीहरूका समर्थकलाई देउवाको उदारतालाई ‘कमजोरी’ नभई ‘सम्मान योग्य संस्कार’का रूपमा लिन आग्रह गर्दै कांग्रेसलाई फुटको संघारमा पुर्याउनेभन्दा संगठन बचाउन अग्रसर हुन आग्रह गरिन्।
उनले स्पष्ट पारिन्, “आजको वास्तविकता के हो भने कांग्रेसलाई बचाइरहेको शक्ति सभापति देउवाको संयम हो, आक्रोश र धम्कीको राजनीति होइन।” पार्टीभित्रको चलिरहेको वाकयुद्ध र आरोप–प्रत्यारोपबीच नेवि संघ नेतृ गुरुङको यो टिप्पणीले कांग्रेसभित्रका असन्तुष्ट धारहरूलाई पुनः संवाद र संगठनात्मक मर्यादातर्फ फर्कने सन्देश दिएको देखिन्छ।
प्रतिक्रिया दिनुहोस्