धनगढी – दार्चुलाको अपिहिमाल गाउँपालिका र कैलालीको धनगढी उपमहानगरपालिकाबीच आपसी समन्वय, सहकार्य र भगिनी–सम्बन्ध कायम गर्ने समझदारी भएको छ। धनगढी उपमहानगरपालिकाका मेयर गोपी हमाल र अपिहिमाल गाउँपालिकाका अध्यक्ष भगत सिंह ठेकरे बोहराबीच धनगढीमा भएको भेटवार्ताले द्विपक्षीय साझेदारीका महत्वपूर्ण आधारहरू स्थापित गरेको हो।
मेयर हमालको न्यानो आतिथ्यता तथा मायाको चिनोप्रति कृतज्ञता व्यक्त गर्दै अध्यक्ष बोहराले भेटवार्ता अत्यन्तै उपयोगी र भविष्यमुखी भएको बताए। दुवै स्थानीय तहबीच अपिहिमाल तथा समग्र सुदूरपश्चिमको पर्यटन विकासमा सहकार्य गर्ने, धनगढी उपमहानगरपालिकामा सञ्चालन हुने रोजगारी मेला तथा सिपमूलक तालिमहरूमा अपिहिमालका युवाहरूको सहभागिता सुनिश्चित गर्ने विषयमा साझा समझदारी बनेको छ। यससँगै निकट भविष्यमै धनगढी उपमहानगरपालिका–स्तरीय जनप्रतिनिधि तथा कर्मचारीहरूको मैत्रीपूर्ण भ्रमण अपिहिमाल क्षेत्रमा आयोजना गर्ने प्रारम्भिक सहमतिसमेत भएको छ। दुवै तहका प्रमुखद्वयले यस सहयोगले प्रदेशको पर्यटन, रोजगार, सीप विकास र स्थानीय–स्थानीय समन्वयलाई नयाँ उचाइमा पुर्याउने विश्वास व्यक्त गरेका छन्। महत्त्वपूर्ण भेटघाटमा सहयोग पुर्याएको भन्दै होटल व्यवसायी संघ कैलालीका अध्यक्ष केशब पाण्डे र नाटा सुदूरपश्चिमका अध्यक्ष पदम बहादुर सिंहप्रति अध्यक्ष ठेकरेले धन्यवाद व्यक्त गरेका छन् ।
प्रतिक्रिया दिनुहोस्