काठमाडौँ – काठमाण्डू गोर्खाजले नेपाल प्रिमियर लिग(एनपीएल) मा चितवन राइनोजविरुद्व ५३ रनको जित निकालेको छ । तेस्रो जितसँगै काठमाण्डूले पाँच खेलमा ६ अंक जोडेको छ । दोस्रो हार व्यहोरेको चितवनको चार खेलबाट चार अंक छ ।
शुक्रबार त्रिवि क्रिकेट मैदानमा काठमाण्डूले प्रस्तुत गरेको १ सय ४३ रनको लक्ष्य पछ्याएको चितवन १७.२ ओभरमा ८९ रनमै समेटियो । चितवनका लागि देव खनाल र रवि बोपाराले २१–२१ तथा सोहेल तनवीरले १८ रन बनाए । अन्य ब्याटरले दोहोरो अंकमा रन जोड्न सकेनन् । काठमाण्डूका लागि राशिद खानले तीन, मिलिन्द कुमार, शाहब आलम र कप्तान करण केसीले दुई–दुई तथा सन्तोष यादवले एक विकेट लिए । त्यसअघि टस हारेर ब्याटिङको निम्तो पाएको काठमाण्डूले १९.४ ओभरमा सबै विकेट गुमाउँदै १ सय ४२ रनको योगफल तयार पारेको थियो । काठमाण्डूका लागि जोहन सिम्पसनले २९ बलमा पाँच छक्का र तीन चौकाको मद्दतले सर्वाधिक ६० रनको योगदान गरे । यसैगरी मिलिन्द कुमारले ३८ र बेन चार्ल्सवर्थले १३ रन बनाए ।
चितवनका लागि सोहेल तनवीरले चार ओभरमा २५ रन खर्चिएर सर्वाधिक चार विकेट लिए । यसैगरी रञ्जित कुमार र कमलसिंह ऐरीले दुई-दुई तथा रवि बोपाराले एक विकेट हात पारे ।
प्रतिक्रिया दिनुहोस्