काठमाडौँ – निर्वाचन आयोगले शिक्षक, प्राध्यापक र कर्मचारीहरूलाई निर्वाचन आचारसंहिता विपरीत कुनै पनि दल र उम्मेदवारको चुनाव प्रचारमा नलाग्न चेतावनी दिएको छ । आयोगले सोमबार विज्ञप्ति जारी गर्दै केही प्राध्यापक तथा शिक्षक कर्मचारीहरू राजनीतिक दल तथा उम्मेदवारको पक्षमा प्रचारप्रसारमा संलग्न भएकोबारे उजुरी परेको जनाएको छ । आयोगले उक्त कार्य शिक्षा ऐन र निर्वाचन आचारसंहिता २०८२ को दफा १० को खण्ड (ग) विपरीत भएको प्रस्ट पार्दै सचेत गराएको सहसचिव एवम् प्रवक्ता नारायणप्रसाद भट्टराईले जानकारी दिए । प्रवक्ता भट्टराईले सोमबार जारी गरेको विज्ञप्तिमा आचारसंहिता प्रतिकूल हुने गरी निर्वाचन प्रचार प्रसार गतिविधिमा सामेल भएको पाइए आचारसंहिताको दफा ४८ बमोजिम कारबाही गर्ने चेतावनी दिएको छ ।
प्रतिक्रिया दिनुहोस्