काठमाडौँ – नेपाल उद्योग वाणिज्य महासङ्घका अध्यक्ष चन्द्रप्रसाद ढकालले गैरआवासीय नेपालीहरूलाई ढुक्क भएर नेपालमा लगानी गर्न आग्रह गर्नुभएको छ।
गैरआवासीय नेपाली सङ्घको १२ औँ वार्षिक साधारण सभालाई सम्बोधन गर्दै अध्यक्ष ढकालले नेपालमा अहिले राजनीतिक स्थिरता कायम भएको र लगानीका लागि अनुकूल वातावरण बनेको बताउनुभयो। उहाँले जलविद्युत्, पर्यटन, सूचना प्रविधिलगायतका क्षेत्रमा लगानी गर्न आह्वान गर्नुभयो।
विश्वभर भइरहेका द्वन्द्व र कोभिड–१९ जस्ता महामारीको उदाहरण दिँदै उहाँले जस्तोसुकै परिस्थितिमा पनि मातृभूमि नै अन्तिम गन्तव्य र प्राथमिकता हुने उल्लेख गर्नुभयो।
विगतमा केही गैरआवासीय नेपालीहरूले व्यक्तिगत रूपमा गरेका लगानीमा सही साझेदार नपाउँदा वा उचित स्थानमा लगानी नहुँदा समस्या आएको गुनासो सुनिए पनि ती केवल अपवाद मात्र भएको उहाँले स्पष्ट पार्नुभयो। नेपालमा पहिलो पटक दर्ता भएको गैरआवासीय नेपाली लगानी कम्पनीसँग महासङ्घले सहकार्य गरेर एउटा आयोजना अगाडि बढाइसकेको जानकारी दिँदै उहाँले संस्थागत लगानीमा जोड दिनुभयो।
अध्यक्ष ढकालले भन्नुभयो, “अहिलेको विश्व परिवेश हेर्दा, चाहे मध्यपूर्वको द्वन्द्व होस् वा कोभिडको समय, अन्तिममा फर्किने ठाउँ भनेको आफ्नै जन्मभूमि हो। म आफैँ एक उद्यमी र निजी क्षेत्रको छाता सङ्गठनको अध्यक्षको हैसियतले भन्छु—नेपालमा जुनसुकै व्यावसायिक क्षेत्रमा लगानी गरे पनि जति सम्भावना र अवसर यहाँ छ, सायदै अन्यत्र कतै होला।”
मुलुकमा अहिले स्थायी सरकार बनेको र यसले निजी क्षेत्र तथा गैरआवासीय नेपालीले खोजेको राजनीतिक स्थिरता दिएको उहाँको भनाइ छ। महासङ्घकै पहलमा सरकारले उच्चस्तरीय आर्थिक सुधार आयोग गठन गरेको र स्वदेशी तथा विदेशी लगानी भित्र्याउन विभिन्न कानुनहरू परिमार्जन भइरहेको उहाँले जानकारी दिनुभयो।
नेपालमा पुँजी र सम्भावना छैन भन्ने नकारात्मक भाष्यलाई चिर्न महासङ्घ, नेपाल उद्योग परिसङ्घ, नेपाल चेम्बर अफ कमर्स र गैरआवासीय नेपाली सङ्घ लगायतको सहभागितामा १० अर्ब रुपियाँको ‘नेपाल डेभलपमेन्ट पब्लिक लिमिटेड’ कम्पनी स्थापना गरी काम सुरु भइसकेको उहाँले बताउनुभयो।
गैरआवासीय नेपालीहरूसँग कुनै नयाँ नवप्रवर्तन वा आयोजना भएमा त्यसमा उक्त कम्पनीले स्वामित्व साझेदारीका रूपमा लगानी गर्ने घोषणासमेत उहाँले गर्नुभयो।
प्रतिक्रिया दिनुहोस्