काठमाडौं – नेशनल प्याब्सन काठमाडौँ जिल्ला कार्यसमितिको आयोजनामा ‘आठौँ खेलकुद सप्ताह–२०८२’ यही मंसिर २२ गतेदेखि सुरु हुने भएको छ। भव्य उद्घाटन समारोहसहित प्रारम्भ हुन लागेको यस वर्षको खेलकुद सप्ताह विद्यालय तहका विद्यार्थीहरूमा खेलकुदको विकाससँगै अनुशासन, नेतृत्व क्षमता र सक्षम नागरिक निर्माण गर्ने उद्देश्यका साथ आयोजना गरिँदैछ।
विगत वर्षहरूमा जस्तै यस पटक पनि काठमाडौँका संस्थागत विद्यालयहरूबीच आपसी एकता, सहकार्य र मित्रताको भावना अभिवृद्धि गर्ने तथा विद्यार्थीहरूको शारीरिक, मानसिक र सामाजिक विकासमा योगदान पुर्याउने विश्वास आयोजकले व्यक्त गरेको छ। नेशनल प्याब्सन काठमाडौँ जिल्ला कार्यसमितिका उपाध्यक्ष तथा अतिरिक्त क्रियाकलाप प्रमुख प्रेम कुमार भुजेलका अनुसार खेलकुद सप्ताहले विद्यालयका प्रतिभाशाली युवाहरूलाई पहिचान र अवसर प्रदान गर्दै खेलकुद क्षेत्रमा नयाँ उर्जाको संचार गर्दै आएको छ।
आयोजक समितिले मंसिर १८ गते पत्रकार सम्मेलन गरी प्रतियोगिता, खेलका विधा, सहभागी विद्यालय तथा सम्पूर्ण कार्यक्रमबारे विस्तृत जानकारी दिने जनाएको छ। आठौँ खेलकुद सप्ताह मंसिर २९ गते औपचारिक समापन गरिने नेशनल प्याब्सन काठमाडौँले जनाएको छ।
प्रतिक्रिया दिनुहोस्