सुनसरी । सप्तकोशी नदीको विशालता, बराहक्षेत्रको धार्मिक महत्व र सुसौलीघाटबाट देखिने अद्वितीय सूर्यास्तको सौन्दर्यलाई पर्यटन विकाससँग जोड्दै ‘ह्यापी ल्याण्ड कम्पनी’ले सुनसरीको बराह नगरपालिका–२, सुसौलीघाटमा बहुआयामिक पर्यटन पार्क निर्माणलाई तीव्रता दिएको छ। नेपालका विभिन्न भू–भागमा नयाँ पर्यटकीय नमूना विकास गर्ने दीर्घकालीन योजनाअन्तर्गत कम्पनीले सुसौलीघाटलाई पहिलो ‘मोडेल प्रोजेक्ट’का रूपमा अघि बढाइरहेको छ। वर्तमानमा ५ बिगा १० कठ्ठा क्षेत्रफलमा पूर्वाधार निर्माण सुरु भइसकेको छ भने थप जग्गा खरिद प्रक्रिया निरन्तर जारी रहेको कम्पनीले जनाएको छ।
एड्भेन्चरदेखि नाइट–क्याम्पसम्म एकै ठाउँमा
सुसौलीघाटलाई एटिभी बाइक, नदी–तटीय मनोरञ्जन, नाइट–क्याम्प, सांस्कृतिक प्रस्तुती र सूर्यास्त अवलोकन सबै सुविधासहितको ‘एड्भेन्चर–सनसेट पार्क’का रूपमा विकास गर्न लागिएको छ। परियोजना अनुसार—
- १०० मिटर उचाइको बन्जी जम्प टावर
- सप्तकोशी नदी वारपार गर्ने जिप–लाइन
- डेजर्ट सफारी पार्क
- टापुमा नाइट–क्याम्प
- रिभर–फ्रन्ट मनोरञ्जन क्षेत्र
- साप्ताहिक कन्सर्ट, डिजे हब र सांस्कृतिक कार्यक्रम
जस्ता आकर्षणहरू सञ्चालनमा ल्याइनेछन्। कम्पनीले यस क्षेत्रमा गोवाको तटीय आकर्षण, सिंगापुरको सेन्टोसा पार्क, र दुबईको डेजर्ट सफारी पार्क जस्तै थिम पार्कको अनुभूति दिने उद्देश्य राखेको छ।
स्थानीय रोजगारी र सहकार्य मोडललाई प्राथमिकता
परियोजनाको मूल नेतृत्व विदेशमा सीप सिकेर फर्किएका युवाहरूले सम्हालेका छन्। कम्पनीले स्थानीय रोजगारी, व्यवसाय विस्तार, होमस्टे प्रवर्द्धन, तथा मौलिक कला–संस्कृति प्रदर्शनलाई परियोजनाको आधार बनाइएको जानकारी दिएको छ। यसका लागि स्थानीय समुदाय, स्थानीय सरकार र निजी क्षेत्रबीच सहकार्यको मोडल तयार गरिएको छ, जसले दीर्घकालीन रूपमा बराहक्षेत्र र आसपासका बासिन्दालाई प्रत्यक्ष–अप्रत्यक्ष रूपमा आर्थिक लाभ पुर्याउने अपेक्षा गरिएको छ। सुसौलीघाटमा भइरहेको यो परियोजना सम्पन्न भएपछि सुनसरीको पर्यटन सम्भावनामा नयाँ अध्याय थपिने, आन्तरिक तथा बाह्य पर्यटक आकर्षित हुने, तथा स्थानीय अर्थतन्त्रमा ठूलो योगदान पुग्ने सरोकारवालाहरूको विश्वास छ।
प्रतिक्रिया दिनुहोस्