हङकङ ताइ पोका आवासीय टावरहरूमा भीषण आगलागी: ४४ जनाको मृत्यु

हङकङको ताइ पो जिल्लास्थित वाङ फुक कोर्ट आवासीय क्षेत्रमा बुधबार दिउँसो २:५१ बजे सुरु भएको भीषण आगलागी अहिलेसम्म पूर्ण रूपमा नियन्त्रणमा आउन सकेको छैन। ३२ तले एउटा टावरबाट सुरु भएको आगो तीव्र हावाका कारण फैलँदै कुल ८ ठूला आवासीय टावरमध्ये ७ वटा भवनमा सल्किएको अन्तर्राष्ट्रिय मिडियाहरूले बताएका छन्।  १९ घन्टाभन्दा बढी समय बित्दा पनि आगो निभ्न सकेको छैन। ती भवनहरूमा २ हजारभन्दा धेरै अपार्टमेन्ट रहेका छन् भने ४ हजार ८ सयभन्दा बढी बसोबास गर्ने छन्। अहिलेसम्म ४४ जनाको मृत्यु भइसकेको पुष्टि भएको छ। ६२ जनाभन्दा बढी घाइते छन् र २७९ जना अझै सम्पर्कविहीन रहेको अधिकारीहरूले जनाएका छन्। एक जना अग्निनियन्त्रकको जलेर मृत्यु भएको छ भने अर्को गम्भीर अवस्थामा छन्। बिहीबार बिहानसम्म पनि आकाश धुवाँले ढाकिएको छ। भवनहरूबाट बलिरहेको आगो र बाक्लो धुवाँका मुस्लोहरू निस्किरहेको रिपोर्ट सीएनएनले दिएको छ। उद्धारका लागि ठूलो संख्यामा सुरक्षाकर्मी, दमकल, एम्बुलेन्स र उद्धार टोली परिचालन गरिएको छ।

आगलागीको कारण आधिकारिक रूपमा खुलेको छैन। तर, प्रारम्भिक अनुसन्धानमा निर्माणका समयमा आवश्यक सुरक्षा मापदण्ड पूरा नगरिएको आशङ्का गरिएको छ। यसै आधारमा ५२ देखि ६८ वर्ष उमेर समूहका निर्माण कम्पनीका निर्देशक तथा एक इन्जिनियरिङ परामर्शदाता गरी तीनजना पक्राउ परेका छन्।

आगलागी भएको ३२ तले भवनमा मर्मत कार्य भइरहेको थियो र बाहिरी भागमा बाँसको स्काफोल्डिङ लगाइएको थियो। त्यहीँबाट सुरु भएको आगो हावाका कारण अन्य टावरमा फैलिएको अनुमान छ। अत्यधिक तापक्रम, झरिरहेका भग्नावशेष र स्काफोल्डिङका कारण उद्धार कार्य अत्यन्त चुनौतीपूर्ण बनेको छ। करिब ९ सय जनालाई अस्थायी आश्रयस्थलमा सारिएको छ।  आगो नियन्त्रण अधिकारीहरूले चारवटा भवनको आगो नियन्त्रणतर्फ उन्मुख रहेको बताएका छन्, तर अझै जोखिम कायमै छ।

यसअघि सन् १९९६ मा काउलुनको एक व्यावसायिक भवनमा भएको आगलागीमा ४१ जनाको मृत्यु भएको थियो। तर बुधबारदेखि लागेको यो आगलागी हङकङकै सबैभन्दा घातक घटनाका रूपमा दर्ता भएको छ।