काठमाडौँ – अपिहिमाल गाउँपालिका – नेपाल सरकार संस्कृति तथा पर्यटन मन्त्रालयको सहकार्यमा नेपाल पर्वतीय प्रतिष्ठान र अपिहिमाल गाउँपालिकाले संयुक्तरूपमा आयोजना गरेको १५ दिने ट्रेकिङ गाइड तालिम सोमबार औपचारिक रूपमा उद्घाटन गरिएको छ। स्थानीय पर्यटन क्षेत्रको सम्भावना पहिचान गर्न तथा युवा पुस्तालाई पेशागत रूपमा सक्षम बनाउन लक्षित यो तालिमले अपिहिमाल गाउँपालिकाको पर्यटन विकासमा महत्वपूर्ण योगदान गर्ने अपेक्षा गरिएको छ।
गाउँपालिकाले पछिल्लो समय युवामैत्री कार्यक्रमहरूलाई प्राथमिकता दिंदै आएको छ। त्यही रणनीतिक प्रयासको निरन्तरता स्वरूप शुरु गरिएको यो तालिमले युवाहरूमा पर्यटनसम्बन्धी ज्ञान, सीप र चिन्तन अभिवृद्धि गर्ने स्थानीय तहले विश्वास व्यक्त गरेको छ। तालिममा सहभागी हुने युवाहरूले भविष्यमा पेशागत गाइडका रूपमा कार्य गर्दै स्थानीय पर्यटन प्रवर्द्धनमा थप ऊर्जा थप्ने आयोजकहरूको भनाइ छ।
प्रतिक्रिया दिनुहोस्