भक्तपुर – नेपाली कांग्रेस बागमती प्रदेश कार्यसमितिको १३औँ पूर्ण बैठक एवम् प्रदेशसभा संसदीय दलको संयुक्त बैठक भक्तपुरको रमणीय नगरकोटमा आज पनि जारी रहनेछ । शुक्रबारदेखि सुरु भएको यो महत्वपूर्ण बैठकले प्रदेश कांग्रेसको आगामी दिशा र केन्द्रीय समितिलाई दिइने सुझावका बारेमा गहन छलफल गरिरहेको छ । बागमती प्रदेशका मुख्यमन्त्री एवम् कांग्रेस बागमती प्रदेश सभापति इन्द्रबहादुर बानियाँले उद्घाटन गरेको यस बैठकमा क्रियाशील सदस्यता विवाद, महाधिवेशनको मिति निर्धारण र पार्टी एकताका विषयमा विशेष जोड दिइएको छ । बैठकमा सहभागी प्रदेश समितिका सदस्यहरु, प्रदेशसभा सदस्यहरु र १३ जिल्लाका सभापतिहरुबीच क्रियाशील सदस्यताको विवाद टुङ्ग्याएर मात्रै महाधिवेशनको मिति तय गर्नुपर्नेमा एकमत देखिएको छ । केन्द्रीय समितिले महाधिवेशनको दुई फरक कार्यतालिका सार्वजनिक गरेपछि कार्यकर्तामा छाएको अन्योलतालाई चिर्न यस्तो निर्णयमा पुगिएको हो ।
मुख्यमन्त्री बानियाँले केन्द्रीय समिति बैठकमा महाधिवेशनको मितिका विषयमा अनावश्यक विवाद सिर्जना नगर्न आग्रह गर्दै भने, ‘केन्द्रीय समिति बैठकले पहिला विधान समिति र क्रियाशील सदस्य छानबिन समिति बनाओस्। छानबिन समितिले प्रतिवेदन बुझाएको १५ दिनभित्र महाधिवेशनको मिति तोक्ने काम होस्, महाधिवेशन निर्वाचन अगाडि र पछाडि भनेर विवाद नगरोस् ।’
उनले महाधिवेशनलाई लिएर पार्टीभित्र अनावश्यक ध्रुवीकरण सिर्जना गर्दा कांग्रेसको अस्तित्व नै खतरामा पर्ने चेतावनी दिए । मुख्यमन्त्री बानियाँले चुनावमा टिकट वितरणलाई लिएर बजारमा अनावश्यक हल्ला चलाइएकोमा पनि असन्तुष्टि व्यक्त गरे । उनले जो सभापति भए पनि सबैलाई मिलाएर अधिकतम सहमतिमा टिकट वितरण नगरे कांग्रेसले आफ्नो जनआधार गुमाउने बताए । ‘जो सभापति भए पनि सबैलाई मिलाएर अधिकतम सहमतिमा टिकट नबाँडे कांग्रेसले अस्तित्व नरहने,’ उनले स्पष्ट पारे । बैठकमा प्रदेश समितिका १३० सदस्य, ३७ प्रदेशसभा सदस्य र १३ जिल्लाका सभापतिहरुको उपस्थिति रहेको छ । यस बैठकले घनीभूत छलफल पश्चात् केन्द्रीय समितिलाई सशक्त सुझाव दिने र पार्टीभित्रको आन्तरिक एकतालाई थप सुदृढ बनाउने विश्वास गरिएको छ ।
प्रतिक्रिया दिनुहोस्